অসম আন্দোনল বুলিলে সাধাৰণতে অবৈধ বাংলাদেশী আৰু অবৈধ বিদেশীৰ কথাই প্ৰথমে মনলৈ আহে। কিন্তু এই অবৈধ বিদেশী নাগৰিকসকল কেতিয়া ক'ৰ পৰা আৰু কেনেকৈ আহিল সেই বিষয়ে জনাতো আজি নতুনকৈ উদ্ভৱ হোৱা আন্দোলনৰ উকমুকনিত অংশগ্ৰহণ কৰা বহুতেই নাজানে। এই বিষয়ৰ জ্ঞানহীনতাই অসম আন্দোলনৰ এই নতুন পৰ্বক বিপথে পৰিচালিত কৰাৰো আশংকা নথকা নহয়। আজি অসমত বিদেশী চিনাক্তকৰণৰ বাবে চৰকাৰৰ উপৰিও স্থানীয় ৰাইজৰ সহযোগিতা লাগিবই আৰু তাৰ বাবে সকলোৱে এই "বিদেশী" বুলি আচলতে কাক কোৱা হৈছিল তাক ভালদৰে জানিবই লাগিব।
চিত্ৰঃ নেলী হত্যাকাণ্ডৰ আগতে প্ৰকাশ পোৱা বাংলাদেশী অধ্যুসিত অঞ্চলৰ এখন আনুমানিক মানচিত্ৰ, সংগ্ৰহঃ ইণ্টাৰনেট
অসমত প্ৰথমে বহিৰাগতৰ প্ৰব্ৰজন ঘটাইছিল ইংৰাজে-
ক] চাহ বাগানৰপৰা কাম কৰাৰ বাবে ছোটনাগপুৰ আদি অঞ্চলৰ পৰা বিভিন্ন উপজাতিৰ বনুৱা আৰু
খ] চৰ অঞ্চলৰ খেতি-বাতি কৰিবলৈ পূৱ বংগৰপৰা পৰিশ্ৰমী আৰু কষ্টসহিষ্ণু কৃষক।
১৯৫০ চনত প্ৰণয়ন কৰা The Immigration (Expulsion from Assam) Act, 1950 মতে ঠিক কৰা হৈছিল যে, পাকিস্তানৰ অনাইছলামিক ব্যক্তিয়ে যদি গোষ্ঠী সংঘৰ্ষৰ ভয়ত আহি ভাৰতত প্ৰৱেশ কৰে তেন্তে তাক শৰণাৰ্থী আখ্যা দিয়া হব। ১৯৭১ চনৰ ২৫ মাৰ্চত "বংগবন্ধু" শেখ মজিবৰ ৰহমানে নিৰ্বাচনত জয়লাভ কৰি পূৰ্ব্ব পাকিস্তানক ধৰ্মনিৰপেক্ষ বাংলাদেশ আখ্যা দিছিল। ফলত ১৯৭১ চনৰ ২৫ মাৰ্চৰ পিছত ভাৰতবৰ্ষলৈ এনে লোকৰ প্ৰব্ৰজন নিষিদ্ধ হ'ল। ধৰ্মৰ নামত ত্ৰাসিত লোকৰ বাবে সেইবাবে ভিত্তি বৰ্ষ হৈ পৰিল ১৯৭১ চন।
আনহাতে ১৯৪৮ চনৰ ১৯ জুলাইৰ আগতে পাকিস্তানৰ পৰা আহি ভাৰতত বসবাস কৰিব লোৱা লোকক সংবিধানৰ ৬ নং অনুচ্ছেদমতে ভাৰতীয় নাগৰিক বুলি ধৰা হয়। কিন্তু এইসকল লোকক চিনাক্তকৰণ কৰাত দূৰুহ হোৱা হেতুকে ১৯৫১ চনত তৈয়াৰ কৰা লোকগননাৰ নথি-পত্ৰকেই আন্দোলনৰ মূল বিষয় বিদেশী বহিষ্কৰণৰ ভিত্তি বৰ্ষ কৰি লবলৈ আন্দোলনকাৰীসকলে ঠিৰাং কৰি লৈছিল।
কিন্তু আন্দোলনকাৰীসকলৰ ভিত্তিবৰ্ষ ১৯৫১ চনক চৰকাৰে কোনোপধ্যেই মানি লোৱা নাছিল। চৰকাৰে ১৯৭১ চনক ভিত্তিবৰ্ষ হিচাপে আন্দোলনকাৰীসকলক মান্তি কৰাবলৈ চেষ্টা চলাইছিল। ফলত সৰ্বসাধাৰণৰ মাজতো ১৯৫১ আৰু ১৯৭১ চনৰ কোনটো মানিব কোনটো নামানিব তাক লৈ ভিন্নমতৰ সৃষ্টি হৈছিল। ফলত আন্দোলনৰ যিসকলে ১৯৫১ চনক ভিত্তিবৰ্ষ হিচাপে মানি লৈছিল তাক আন্দোলনৰ পক্ষে থকা বুলি আৰু যিয়ে ১৯৭১ চনক ভিত্তিবৰ্ষ বুলি মানি লৈছিল তাক আন্দোলনৰ বিৰোধী বুলি গন্য কৰা হৈছিল।
[সমল পুথিঃ অসম আন্দোলনঃ প্ৰতিশ্ৰুতি আৰু ফলশ্ৰুতি]
No comments:
Post a Comment