ৰাজ্যসভাৰ নিৰ্বাচন আৰু বহিৰাগত প্ৰাৰ্থী

কোনফালে গৈ আছে সময়? কোনফালে বলি আছে বতাহ? নাজানো, কাৰণ আমি সৰ্বসাধাৰণ৷ আমাৰ হৈ মাত মতাৰ বাবে আমাক জনপ্ৰতিনিধি লাগে আৰু সেই জনপ্ৰতিনিধিসকলেই আমাক ভুকুৱাই পকাব যায়৷ কেৱল মাত্ৰ ৰাজনৈতিক স্বাৰ্থৰ বাবেই, গাদী ৰক্ষাৰ বাবেই আমাৰ অচিন, আমাক চিনি নোপোৱা কৰবাৰ হত্যাৰ অভিযোগত অভিযুক্ত এজনক আনি বৰপীৰাত বহালেহি৷ ছিঃ, নিৰ্লজ কাৰবাৰ৷ আজিৰ বাহিৰে কাইলৈ তেওঁ ভুলতেও অসমলৈ নাহিব, সমস্যা সমাধান কৰাতো দূৰৈৰে কথা৷ অথচ আমাৰ কাৰোৰে মাত নাই৷ আমি ব্যস্ত ৰাজকুমাৰৰ সাক্ষাতকাৰক ৰোমন্থন কৰাত৷ কি কৰিব, পৰিস্থিতিয়ে আমাক তাকেই শিকাইছে৷ আজি ৰাজ্যসভাত প্ৰাৰ্থী বাহিৰৰ পৰা আমদানি কৰা হৈছে, কাইলৈ লোকসভাতো আনিব, আৰু আমি চকু মুদি তেওঁক বৰ আসন পাৰি দিম৷ তাৰ বাহিৰে আমি কিবা কৰিব পাৰিম জানো! এনেকৈয়ে এদিন বিলীন হব আমাৰ অধিকাৰ, কাৰণ আমাৰ এই মৌলিক অধিকাৰক ৰাজনীতিৰ দালালসকলে আৰামেৰে ব্যৱহাৰ কৰি যাব তেওঁলোকৰ স্বাৰ্থত৷ হে অসমীয়াসকল, এতিয়াও সময় শেষ হোৱাগৈ নাই৷ সকলোৱে নিজৰ নিজৰ ধৰণেৰে প্ৰতিবাদ কৰা৷ নহলে আমাৰ জালেৰে আমাৰে পুখুৰীত থকা মাছক লৈ আনে ব্যৱসায় কৰিব৷

(ৰচনাকালঃ ২৯ জানুৱাৰী, ২০১৪)